TM SIM

Samtang nagamoderno ang panahon,

nagaupod man ang mga pamatan- on,

sang ginbun-ag ining mga computer kag cellphone,

nagtuhaw man ang makahalalit nga mga jejemon.

Husto nga mga gramatika nga tinun- an,

amat amat na nga nagataliwan,

pati ang husto nga mga paminatasan,

amat amat man nga ginakalimtan.

Ang pagpahapos sang komunikasyon kag mga impormasyon,

ang nahauna nga rason sang aton nga mga alamon,

kun ngaa ang teknolohiya aton naangkon,

kuntani sa husto nga pagginawi ini gamiton.

Cellphone ,gamiton sa mga emerhensiya,

o di gani pakipag- abyan kag komento sa mga balita,

indi nga sa pagpangsasko, nobyo nobyo o nobya nobya,

napabay an mo na ang pagtuon, kakita ka pa kontra.

Jejemon na ang grupo nga lapnag subong nga panahon,

sila ang mga tinuga sa computer kag cellphone,

wrong spelling nga mga tinaga ang ila ginapalapta,

nga nagapalikaw sa insakto nga tinun an sang mga bata.

Ini nga panalambiton, ginahalad ko sa mga pamatan- on,

kuntani mabuksan ang inyo panumduman kag balatyagon,

henerasyon kamu nga ginasandigan sang pungsod naton,

nga makabatak sining umang naton nga sitwasyon.

Daku gid ang mabulig sining teknolohiya nga mga moderno,

makapahapos sang aton adlaw adlaw nga pagsinarayo,

kung aton ini gamiton sa buluhaton nga husto,

piho kadalag an gid ang maangkon mga nene kag toto.

Ang mga dalagku nga palaligban nagagikan sa gagmay nga butang,

gani, ining mga wrong spelling sang mga jejemon indi niyo na pagpabuyan buyanan,

kung indi matapna sa gilayon, piho gid nga makaupang,

sa husto nga pagtuon ninyo mga kabataan.

Gani, panumdumon ninyo mga pinalangga nga pamatan- on,

tagaan limit ang pagsunod sa mga moderno nga sitwasyon,

indi magpadasu- dasu ,inyo gid kuntani nga binag- binagon,

kung ang butang nga na makapaayo o makahalit sa palaabuton.

Sa mga ginikanan nga gapamati sa sini nga waragwagan,

bulubantayi o laygay laygayi man ang inyo mga kabataan,

sa husto nga pagdumala o paggamit sining teknolohiya nga moderno,

bangud may TM SIM na nga sugilanon subong nga tiyempo.

Teknolohiyang Moderno- Sa Ila Makapabag- o.