Atleta nga Ilonggo: Kusog Ka Sang Pagbag-o

Ako gid ang naurungan mga kaabyanan

nadula ang kulba nga akon nabatyagan

sang makita ko ang mala- Adonis kag mala- Venus nga kaanyagan

nga mga hurado nga yari sa akon atubangan

Samtang wala ko pa mapadalman ini nga sugilanon

matam-is nga pagpanamyaw ang isab- og ko sa mga nagtipon

Maayad- ayad nga adlaw sa mga bumulutho, manunudlo, ginikanan kag hukom

nga nagkari agud makasaksi sang paindis indis sang mga sugilanon.

Atleta nga Ilonggo Kusog sa pagbag-o ang aton pagaistoryahan

Handa na bala kamu sa pagpamati mga abyan?

itakod na ang mga seatbelt sang inyo nga mga pulungkuan

bangud kita ang magakayab agud aton makit- an ang mga ginatago nga kinaadman.

Iloilo ang banwa ta nga ginahingadlan kag ginakahamut- an

sa sining dyutay nga isla madamu sang natago nga kinaadman

mga lalantawon nga gikan sa aton madagta nga kadunaan

mga Ilonganon nga bantog sa kinaalam kag amu man sa patag sang hinampang.

Inyo bala nabatian ang ngalan nga Denver Cuello

Sa patag sang boxing masupog ini nga tawo

nanghulam ka itsura sang ido ang iya kaengkwentro

mata naghalalabok, bibig nagbululuslo

idugang ko si James yap nga bantog sa pagbasketball

pamatyagan niya sang bola daw sa bayabas nga mahapos lang nga matukbol

sa paghatag niya sang dedikasyon sa sini nga hampang

nadagit pa niya ang kay Kris Aquino nga dughan.

Mga pilang nahot pa lamang ina nga mga atleta

nga naghatag sang dungog sa sining aton nga banwa

Atleta nga nangin isa ka maayo nga halimbawa

kuntani mga pamatan- on inyo ina nakita.

Ining dughan nga lamharon daw kaangay nga gintapan sang pison

bangud sang lulubngan nga kahimtangan sining aton nga pamatan- on

 Counterstrike sa aga, DOTA sa udto, Special Force sa hapon

Daw kanami ibunggo sanday toto, pinahan kag pangguripaton

kun sa bahin naman sining mga kababayin- an nga mga pamatan- on

tsismis sa aga, lagaw sa udto, pagkagab-i ,facebook ukon ang cellphone

daw langka sa kadamu sang punggod ang ila nga nawong nga nami sapsapon

sa pagpulaw sa kagab- ihon, mata ni iyay nagadalalalum

kag kun magbusong,, ara imu tiyabaw ni nanay daw ginaihaw nga baka sa fiesta celebration.

ining sugilanon ginapahanungod ko sa mga lamharon

pagapaat-hagan ta kamu sa sini nga tini- on

pamati anay sa akon, pahigad ang PSP kag ang cellphone

ihanda ang inyo dulunggan ilabi na ang kaugalingon

mga pinalangga ako ang may igabahin

isa ka prinsipyo gikan sa akon nga kasing kasing

sa aton kaaraydan, kita ang magkaptanay

bangud, wala may makalutus kun kita ang gabuligay

 mga pamatan- on, imuklat na ang inyo mga kalimutaw

sa patag sang hinampang, kamot mo na ang ibayaw

ibantala ang sulo nga simbolo sang aton kadalag- an

sulo nga makahatag sang kasanag sa ginausoy naton nga dalan

Kapti sang maayo ang javelin nga mataliwis kag matalom

tanan nga makapaayad sa aton nga bwasdamlag aton puntiryahon

agwantaha ang paghakwat sang shotput nga tama kabug-at

bangud sa kabuhi daw kaangay ina sang problema nga sa aton abaga nagadapat.

ihatag ang kusog sang mga batiis sa paglumpat sang hurdle nga yara sa imu dalan

bangud daw kaangay ina sang isa ka pagtilaw sa aton kapalaran

panumdumon naton ang tanan nga upang may katapusan

agud maangkon naton ang nagabanaag nga kadalag- an.

Atleta nga Ilonggo kusog ka sang Pagbag- o

ikaw ang mangin sulo sa banwa naton nga Iloilo

ipakita mo nga kita may ginatago man nga kinaadman

bisan magamay kita nga isla, kita man ang may kinaiya nga lain sa iban

Mga wala pulos nga libangan, iwaslik ina mga pamatan- on

Yara ang balaan nga hinampang, ipasanyog naton

ini ang yabi sang aton pag- ululugyon

Makahatag lingaw sa kaugalingon, kag dungog sa banwa naton

hasta na lang diri ang akon nga panaysayon

kabay nga nagtudok ini sa inyo nga taguiposoon

apang ginahingyo ko nga kamu ang magyuhom yuhom

bangud madasig magtigulang, ang masami nagakurisong

sa liwat suguran na naton ang pagbag- o pinalangga

kusog ka sang pagbag- o, Ilonggo nga Atleta