Sa Pamangkot Nag-umpisa

Sa tion nga mag-upod kita nga duwa

Indi gid mapunggan ining mga mata

Nga  ikaw ang tulukon o himutaran

Bangud  gaunong diri ang akon dughan

Nadumduman ko sadto anay

Sang kita indi pa mag- abyanay

Una ka nga tinuga sa akon nagpakanubo

Sa akon pamangkot, saka padalom na tulok naagom ko.

Dili gid ini makakas sa akon panumduman

Bangud yadto nga adlaw akon nga kaadlawan

Pwerte ang kaugot nga akon nabatyagan

Kag nagpromisa nga ikaw ang pagabaslan.

Apang kung magtabo ang banas ta nga duwa

Indi makadiretso tulok ining mga mata

Pinasahi nga balatyagon nga indi ko kaintindi

Bangud bisan pangalan mo sadto wala ko mahibal-i

Nagdisidir ako nga dulaon ka sa akon panumduman

Apang akon nga nasayran ikaw ang may napangaluyagan

_________________ ang iya pangalan

Kainit, kaugot, kasubo ang akon nabatyagan

Sadto ako pa ang may kahagugma

Apang sadto nga ti-on ako ang nagduwa duwa

Kung sin-o ang akon ginapalangga

Ikaw na bala ukon siya?

Apang subong wala na siya

Sa iban nga butkon naangkon siya

Sa pihak nga bahin, nag-abot ka sa akon kabuhi

Sang ginpamangkot ka sa intermission sang CAT

Nangin parte ka na sang kada adlaw nga pagginawi

 Dili makumpleto ning adlaw kun di ka upod sa pagpuli

Ang laragway mo dili makuha sa akon panumduman

Kay bisan sa tagsa ka damgo, wala paltos, ako imu ginaupdan

Sa pihak sang pagpangibot nga akon maagom

Ini ginabalewala, bangud ako man ang malipayon

Bangud ikaw naman ang akon maupod sa malip-ot nga ti-on

Agud akon makusi, madugsing, malumo lumo nga sa akon makapayuhom.

Sa akon panumduman, dili makakas ang imu laragway

Sa ti-on nga kita ang maglangu langu kag magsuyaay

Ang inagi mo nga mga panghulag akon ginabalik balikan

Kung ako na ang makabatang sa akon hiligdaan

Big T, tae, sanamabetsin, ti ano  nga mga sugilanon

Mga pangkabo nga akon maangkon

Apang ini ang sa akon makapayuhom

Kag kis-a makapautoy- utoy kadlaw bisan gaisahanon.

Akon pinalangga, natandog gid ining taguiposoon

Sang ako ang gindangpan isa ka gab-i nga maulanon

Apang ako ang gapangayo sang pasaylo

Bangud sang natabo ,nagluntad ang mga isyu.

Madamu nga salamat akon pinalangga

Nga sa akon kabuhi, ikaw  ang  nasugata

Kabay nga  dili mo ako malimtan

Bangud dili ka madula diri sa akon nga dughan.

Salamat

Kalipay ang akon nabatyagan

Daw nagalupad sa kahawaan

Nagamartsa ining akon dughan

Sang ginpabutyag niya ang nabatyagan

Madugay nga tini-on ang ginhulat

Nga ang gugma niya sa akon magtapak

Dughan ko ang nagalumpat- lumpat

Sang ang pamangkot ko iya ginsabat

Tingog sang mga anghel ang mabatian

Ambahanon nga matam-is sa dulunggan

Kaangay sang paraiso ang ginakahimtangan

Daw sa nag-untat ang dalagan sang orasan.

Madamo nga salamat akon abyan

Nga ako imu man natalupangdan

Bisan sa paagi nga hampang hampang

Kaangay ni ________ nga imu gintiaw tiawan.

Responsibilidad Ta

Ako gid ang naurungan mga kaabyanan

Nadula ang kulba nga akon nabatyagan

Sang makita ko ang mala- Adonis kag mala- Venus nga kaanyagan

Nga mga hurado nga yari sa akon atubangan.

Daw sa indi ako makapati sa subong nga tinion

Yari ako nagatindog agud magpaalintun

Sang isa ka panagupnop halin sa isa ka pamatan-un

Nga kaangay sang kabalyero nga nagabanaag sa kagab- ihon.

Yari naman kita subong sa isa ka kadam an

Agud husayon ang isa ka palaligban

Natuhoy sa gakalatabo sa sining Dutang Ginakahamut- an

pagtaas sang balatian kag pagkawasaag sang kadunaan

sang ako ang makalabay, sa higad sang baybay

akon nasiplatan basura gakapay kapay

kung ikumpara ta sa tawo  daw sa naga hi

kaangay sang mga Ms. Universe, nga nagaki- ay ki- ay.

ako ang naglungo lungo sa akon nga nakit an

sa pihak nga bahin, ginliso ko ang akon panan- awan

kagulangan naman ang nadakpan sining akon kalimutaw

daw sa indi mu na matawag nga kasiutan bangud husto na ka sinaw

Nagligad lamang nga Agosto , Miss Universe ang ginhiwat

Sabat sang lin- ay nga si Venus Raj, masami ginaliwat liwat

Major major niya nga sabat, konektado sa tanan nga butang

gani subong hatagan ko ini koneksyon sa aton ginahambalan

major major ta nga palaligban sa sining Dutang Ginakahamut an

amu ang pagka iresponsable sang mga nagapuyo nga  katawhan

ilabi na sa mga kaangay ko nga mga pamatan- on

paugtas ang obra sa aga, sa udto kag amu man sa hapon

ining sugilanon ginapahanungod ko sa mga lamharon

pagapaat-hagan ta kamu sa sini nga tini- on

pamati anay sa akon, pahigad ang PSP kag ang cellphone

ihanda ang inyo dulunggan ilabi na ang kaugalingon

nagligad lamang nga mga tinuig aton nga nasaksihan

isa ka makasiligni nga hitabo ang aton nadangtan

sang maghugaas ang bagyo nga ginhingadlan nga Frank

nabutang sa ital- ital ang kahimtangan sang aton Dutang Puluy- an

sa subong naman nga tinion mga kaabyanan

nagahari ang Dengue sa syudad nga ginakahamut an

bangud sining mga lamok nga nagapanghalit sa aton panglawason

nga gikan sa mga mahigko nga ugsaran nga ginasayuhan naton.

Ano bala ang gintunaan sining mga kalamidad

di bala, ang pagkalipat sang aton responsibilidad?

kaangay sang paghaboy sining aton nga mga basura

numero uno nga gintunaan sang aton nga problema

sa kada putos sang mga pagkaon nga inyo ginalapta

makapapugong na ina sa ginailigan ka tubig mga pinalangga

kag kung pangitlugan ina sang lamok nga aedes aegypti

piho gid, migo , miga,sakam sakam mo gid ang balatian nga Dengue

dugangan ko pa gid ina nga panaysayon

kung sa iligan sang tubig , basura ang magsupon

gulpi gani bumagyo, mabaha gid sa gilayon

basi makahimu kita arko kaangay sang ginhimu ni Noah sadto nga tini-on

nagalapnag naman subong ang pagpaupas sang damang

bata, tigulang gapanuhot suhot sa mga kagulangan

gilayon manghangkat agud damang pagapustahan

hala sige, hugyaw, singgit tiyabaw kag kung mapyerde gani black eye ang madag-an

mga pinalangga ako ang may igabahin

isa ka prinsipyo gikan sa akon nga kasing kasing

sa aton kaaraydan, kita ang magkaptanay

bangud wala may makalutus kun kita ang gabuligay

sa baylo nga PSP, Cellphone,kag computer ang atubangon

gwa sa ugsaran buligi si nanay kag si lola sa pagpananom

makapapugong pa sa baha,makahatag sang oxygen kag handong ining kakahuyan

nga sa pilang adlaw makahatag sa aton bunga, kahoy, makapabugnaw pa sa mata kun himutaran

sa baylo nga magpanuhot suhot sa pagpanamang

suhuton naton ang kahigaran sang aton nga ugsaran

Himuon ta ini nga pagpaliwa liwa ukon libangan

naglimpyo na ang palibot ikaw pa ang nabalhasan

ah sa inyo ihibalo ang balhas maayo sa kalawasan

kanugon sining kagwapo kun mahigko ang aton palibot

kanugon ang kwarta sang ginikanan kun may balatian nga nagadukot

gani di pa ulihi ang tanan mga kaabyanan

kita ang maghugpong para sa ikaayong lawas naton tanan

hasta na lang diri ang akon nga panaysayon

kabay nga nagtudok ini sa inyo nga taguiposoon

apang ginahingyo ko nga kamu ang magyuhom

bangud madasig magtigulang, ang masami nagakurisong

Katapusan

Unsa man ining taguiposoon

Pirme lang nagatalangison

Panggugma nga sugilanon

Wala gid sang paabuton.

Ikaw ang akon ginhalaran

Sining maila nga dughan

Apang imu lang ginhampangan

Kag mahapos nga tinalikdan

Dughan ko ang gadinugo

Napuno sang kasubo

Kag kung pagabatyagon

Daw sa ginakumos ang corazon

Luha ko ang gainagay

Nga daw isa ka busay

Bangud sa imu nonoy

Dughan ko ang namuloypoy

Akon na lang ini tapuson

Ining akon panalambiton

Nga ako imu man higugmaon

Apang daw indi gid maangkon

Ginahandum ko nga kalipayan

Akon na lang ini kaptan

Paagi nga wala na sang iban

                                                         Ini ginatawag nga KATAPUSAN

Hilaw nga Amerikana

Sang ako ang makalabay sa higad sang baybay

Akon nasipalatan, maanyag nga lin-ay

Sopistikada kag magayon ang iya nga dagway

Apang indi makita ang Pilipina nga laragway.

Ano ang nagakatabo sa mga Pilipina?

Sa diin na ang landong sang aton Maria Clara?

Kita na bala ang matawag nga hilaw nga Amerikana

Sa tanan nga bahin sunod sa uso ang itsura.

Daw inahit nga kilay, imo nga makita

Make-up nga daw pintura, aritos gasangyad sa abaga

Mataas pa sa tuhod ang iya nga palda

Ay abaw! Makita mo man pati pusod niya.

Kung paghigugma naman ang aton pagahambalan

Sang-una ang Pilipina sa balay ginakadtuan

Apang sa subong naton nga kapanahunan

Galuyagay bisan sa kilid sang dalan

Ang mahinhin nga paghulag indi na makit-an

Maluming nga paghambal, raskal na pamati-an

Moderno nga panahon bala ang ginhalinan

Sining pagbag-o sang mga Pilipina nga kadalagahan

Matuod indi naton malikawan mga kauturan

Ining masulog nga pagbag-o sa subong nga kapanahunan

Kuntani indi lang gid naton pagkalimtan

Ang kultura nga aton namat-an

Sa dugang pa nga ihibalo sa akon mga abyan

Ining mga Pilipina maanyag sa panan-awan

Ilabi na sa mga dumuluong diri sa pungsod nga nahamut-an

Bangud sang kinaalam, kaugalian kag kultura nga lain sa iban

Mga Pilipina, inyo gid kuntani nga tipigan

Ining kultura naton nga balaan

Bangud amo na lang ini ang nabil;in sa katawhan

Manggad sang pungsod, dungog naton tanan.

Sa Pamatyag Lang

Venancio,paano ko ikaw malimtan

Gusto ko ikaw dulaon sa panumduman

Apang ika ang ginapitik sang dughan

Paano? Ako na ang daw mabuang

Akon ansayran nga may naulikdan ang kada isa

Ikaw may pamilya, ako may kahagugma

Apang sa guihapon ako ang gaduwa duwa

Kun matuod ang gintunda nga gugma

Apang waay ko ginhinulsulan

Nga sa imu ginpabutyag ang nabatyagan

Bangud ikaw ang una nga paghigugma

Kag sa pamatyag ko, indi gid ina madula

Paglaum Ka Bala Sang Nasyon?

Sadto nga panahon, nakapagkit sa sining panumduman

Paglaum sining nasyon, yara sa pulitiko nga gamhanan

Kag kung ining aton nga gobyerno ang masimpunan

Sang isa ka malain nga ginhawa, piho kita gid ang magaumang.

Korapsyon isa ka malala nga cancer sining pungsod

Makit- an kuno sa mga pulitiko nga mga masupog

Masupog sa pagkalkal ukon pagbulsa sining kaban naton

Ubuson ang manggad sang pungsod, kaugalingon ang lipayon

Ako isa lamang ka ordinaryo nga tinuga

Nga indi makapamatuod sang pagpangkorap nga istorya

Apang ako ang makahatag man sang isa ka ebidensya

Nga sa aton nga gobyerno may nagakatabo nga anomaliya.

Nagligad lamang nga kagab-ihon digya sa siyudad naton

Samtang ako ang nagakuyab kuyab sa inasalan namun

Tatlo ka alagad sang kasuguan ang nagpamalaklon

Sang mag-inisipay, doktoron ko kuno ang presyo

Agud makaginansya man si manong.

Kag sang ako man ang makasakay sa isa ka pampubliko nga salakyan

Isa ka eksena ang indi gid madula sa sining panumduman

Auxillary sa Jaro Plaza  nga kabalan ang akon nakit-an

Pasimple nga nagdaho sang lisensya sining amun nga driver

Bulubalikid, sulat- sulat,lista- lista, gale isa ka gatos ang iya ginbulsa.

Ini isa lamang ka maathag nga sugilanon mga abyan

Mataas man o manubo ang posisyon sining mga gamhanan

May ginalikom man gale nga mga malain nga paminatasan

Nga mangin anay nga nagapagabok sining Dutang Ginkatawhan.

Matuod nga tanan nga tawo may mga kinahanglanon

Apang, kuntani nga ipagkit sa mga utok kag taguiposoon

Nga sa kada piso nga ginakawat kag ginapangalipay naton

Nagasalig ang tiyan kag puturo sang mga kauturan nga umang pa sa aton

Mga utod ko, kuntani kita tanan ang magmainantuson kag maghululugpong

Indi malampasan ining mga palaligban kung kita ang mangin sakon

Ang pagkasakon sa manggad kag gahum ang makapatay sa aton

Indi lamang sa aton nga kaugalingon kundi amu man sa masunod nga henerasyon.

Kung mangin tampad sa posisyon ang tagsa ka mga makagagahum

Piho ang pagtib-ong sining pungsod labaw pa sa ginahaum

Mangin malipayon ang tanan, mangin masulhay ang pangabuhi naton

Wala pa sang away,gamu kag hinisaay sa palibot naton

Gani sa mga makabasa nga mga makagagahum sa sining panalambiton

Kabay mapamangkot ninyo ang inyo nga mga kaugalingon

Kung kamu bala isa ka instrumento sa pagtib- ong sang nasyon

Ukon isa ka sa mga kuto sining nasyon nga kinahanglan na nga tudson.